10/27/2007

ستائیس اور اٹھائیس اکتوبر کی درمیانی رات، یعنی کل، کراچی کے لوگوں نے ایک انتہائی سحر انگیز منظر کا مشاہدہ کیا۔ میں کل شام جب باہر نکلا ہوں تو سامنے ایک بڑا سا چاند آسمان پر دمک رہا تھا۔ میں نے اپنی زندگی میں اتنا حسین منظر نہیں دیکھا تھا۔ یہ چاند تصویر میں اتنا بڑا نظر نہیں آرہا۔ لیکن حقیقت میں بہت ہی زیادہ بڑا اور بہت ہی چمکدار معلوم ہورہا تھا۔ اور شہر کی روشنیوں کے باوجود اس کی روشنی باقاعدہ محسوس ہورہی تھی۔ مغرب کے کچھ دیر بعد اس کی روشنی کچھ گلابی سی تھی پھر، تھوڑی زردی مائل ہوئی اور رات گہری ہونے تک تو بس نہ پوچھیں۔ میرے پاس اگر میرا کیمرہ فون ہی ہوتا تو کچھ تصاویر میں بھی لے لیتا۔ ویسے میرے دفتر اور گھر کی کھڑکیوں سے چاند کا نظارہ بہت ہی حسین نظر آتا ہے۔ میں پہلے بھی ایک تصویر ایسی پوسٹ کرچکا ہوں۔ خیر یہ تصویر آج کے جنگ (کراچی) کے صفحہ اول پر شائع ہوئی ہے اور فوٹوگرافر ہیں جناب شعیب احمد۔

|

گزشتہ روز میں اپنے بھائی عازب کے ہمراہ چند کتابیں خریدنے اردو بازار گیا۔ تب میں نے محسوس کیا کہ تقریبا تمام کتابوں کی دکانوں پر پاکستان میں جمہوریت اور فوج کے سیاسی کردار پر لکھی گئی تنقیدی کتابیں نمایاں کرکے لگائی گئی ہیں اور سب سے زیادہ فروخت بھی ہورہی ہیں۔

جب میں نے کتابوں کی دکان پر ملٹری انک مانگی تو انہوں نے چپکے سے مجھے اندر سے کتاب ایک سفید کاغذ میں اچھی طرح لپیٹ کر لاکر دی۔ سوائے آکسفورڈ یونیورسٹی پریس کی دکان کے اور کسی دکان پر ملٹری انک نمایاں کرکے نہیں رکھی گئی تھی۔ اس کے باوجود کتاب دھڑا دھڑ فروخت ہورہی ہے۔ پاکستان میں جہاں اردو ناولوں کی ہزار کاپیاں بڑی مشکل سے فروخت ہوتی ہیں وہاں کسی انگریزی کتاب کی چھ ہزار کاپیاں صرف دو ہفتے میں بک جانا ایک کمال ہے۔ اس سے ثابت ہوتا ہے کہ عوام ملٹری کے معاشی اور سیاسی مفادات سے ناواقف نہیں اور وہ ان کے بارے میں مزید جاننا اور پڑھنا چاہتے ہیں۔

کل میں اپنے خالو کے ساتھ اتوار بازار گیا تھا۔ کراچی میں اتوار بازار نام کے کئی عارضی بازار لگتے ہیں۔ الگ الگ علاقوں میں لگنے والے یہ اتوار بازار، الگ الگ خصوصیات کے سبب جانے جاتے ہیں۔ نارتھ کراچی میں لگنے والا یہ اتوار بازار گاڑیوں کے لئے مخصوص ہے۔ اتوار بازار میں استعمال شدہ گاڑیوں کے ڈیلر اور عام لوگ اپنی گاڑیاں فروخت کرنے کے لئے لاتے ہیں۔ خریداروں اور فروخت کرنے والوں کا ایک ہجوم ہوتا ہے۔

آج کل ہم نے ایک سینٹرو خرید رکھی ہے جسے ییچنا دشوار ہوگیا ہے۔ اسی سینٹرو کو لے کر ہم اتوار بازار گئے تھے۔ اس موقع پر میں نے اپنے نئے نوکیا 7610 موبائل فون سے کچھ تصاویر لیں انہیں دیکھنے کے لئے یہاں کلک کریں۔